नेपाली तारामा पुरुषमात्र
कास
काठमाडौं, अमेरिकाबाट सुरु भएको अमेरिकन आइडलको लहर इन्डियन आइडल हुँदै नेपालमा आइपुग्दा यति बेला नेपाली सांगीतिक आकाशका ताराहरू खोज्ने दोस्रो नेपाली तारा जारी छ ।
झन्डै १२ हजार प्रतियोगीबीचबाट उत्कृष्ट पाँचमा पुग्दा महिला शून्य भए । अर्थात् महिला प्रतिस्पर्धीको नेतृत्व गरिरहेकी रोजिना गुरुङ बुधबार नेपाली तारा-२ बाट बाहिरिन्, उत्कृष्ट महिला प्रतिस्पर्धीको उपाधि लिएर ।
नेपाली तारा-२ को उपाधिका लागि अब पुरुष प्रतिस्पर्धी मात्र छन् । युवराज तिवारी, राज सागर, सन्तोष लामा, सूर्यकिरण लामा र तारा लक्सम उनीहरू पनि सातामा एक-एक गर्दै बाहिरिन्छन् ।
यो पटकको बटम-३ मा परेका सन्तोष लामा जित्न दर्शकको भोट आवश्यक हुने बताउँछन् । बटम-३ बाट सुरक्षित बनेका सूर्यकिरण लामा पनि
दर्शकको भोटलाई सफलताको श्रेणी मान्छन् ।
पहिलो नेपाली तारामा उत्कृष्ट बीसबाट बाहिरिएपछि दोस्रो पटक भाग लिएका तारा लक्सम भन्छन्- 'तारा त म छँदैछु, अगाडि नेपाली मात्र थप्न बाँकी छ ।' गीत गाइसकेर फर्किँदै गर्दा आत्तिरहेका पोखराका युवराज तिवारी नेपाली तारा बनिन्छ, बनिँदैन भन्न नसक्ने बताउँछन् ।
'प्रतिस्पर्धा कडा छ, सबै जना उस्तै छौं मूल्याङ्कनको जिम्मा निणर्ायक र दर्शकमा ।' भोजपुरका राज सागर नेपाली ताराको उपाधिको पहिलो दावेदार आफू नै रहेको प्रतिक्रिया दिन्छन् ।
'नेपाली तारा म नै बन्नुपर्छ, किन कि मैले कडा मिहिनेत गरेको छु ।'
उत्कृष्ट दसमा परेका प्रतिस्पर्धी धेरै समय सँगै रहे । कन्सर्टका लागि विभिन्न ठाउँ गए । क्लोज क्याम्पमा बसे । तर हरेक साता एक-एक गर्दै उनीहरू छुटिँदैछन् । 'झन्डै २ महिना संँगै बसियो, आज नेपाली तारा-२ बाट बाहिरिँदाभन्दा साथीहरूसँग छुटिँदा नरमाइलो लागेको छ,' रोजिनाले भनिन् । युवराज पनि एकपछि अर्को साथी छुटिएर जाँदा नरमाइलो लाग्ने बताउँछन् । 'प्रतिस्पर्धाको हिसाबमा प्रतिस्पर्धी बाहिरिँदा त खुसी हुनुपर्ने हो तर आत्मियताको हिसाबले म दुःखी हुन्छु, अब यो क्षण हाम्रो जीवनमा कहिल्यै फर्किंदैन,' राज सागरको पनि अनुभव त्यही छ, 'साथीहरू हरेक साता छुट्नु पर्दा के-के गुमाए जस्तो भान भइरहेको छ ।'
0 Comments:
Post a Comment